Ehrenmitgliederreise 2026

S 8’i Glöggli vo dä Chilä hämmer vernoh,
wo au no s’letscht agmoldänä Ehremitglied uf äm Parkplatz vo dä Migros isch acho.
Z’erst häts gheissä numä über d’Strass müänder gah,
das hämmer ois nöd zwei Mal sägä lah.
Is Gnüsswerk simmer dänn zu Kafi und Gipfeli gangä,
bis zum Zmittag hät dänn das Bödeli müäsä langä.

Uf dä Wäg uf Ebnat-Kappel hämmer ois dänn mit zwei Büssli gmacht,
viil häts z’verzellä gäh, viil hämmer glacht.
Pünktlich simmer uf äm Parkplatz bi Alder& Eisenhut acho,
leider hät oisä Guide än anderi Ziit vernoh.
Ziit hämmer gha so zum astossä uf äm Böse siin Geburi mit Wii,
äs schöns Chreisli hämmer gmacht, äs sind alli däbii.

Ä Füährig dur s Sportgrät-Museum hämmer dänn därfä gnüssä,
zum Abschluss hämmer dänn bim Russische Cheglä chönä uf Kühlä schüssä.
Uf äm ganzä Gländ häts dänn no än Postelauf gha,
Mit ämä chlinä Quiz hämmer d Gschicht vo Alder& Eisenhut nachhär besser chönä verstah.
Wiiter s’Tal uf hämmer nachhär mit dä Büssli no müäsä schüüssä,
bis mär än feinä Apero händ därfä gnüssä.

Im Buuräbeizli Dergeten ob Stei,
Ja da hämmer ois gfühlt sehr schnäll dihei.
Aperölä hämmer dussä därfä mangels Platz,
das hät Glägäheit gäh für so mängä Schwatz.
Äs feins Menü hämmer im härzlichä Huus dinä zu ois gnoh,
oisän Buuch und oisäs Gmüät hät das gmacht sehr froh.

D’Ziit isch verflogä bim spiilä und verzellä,
noimets anderst sii, hät i dänä Momänt gar niämärt vo ois wellä.
Nach ämä sensationellä Dessert hämmer langsam müäsä sägä tschau,
hoffentli chömämär guät hei, so ganz ohni Stau.
Dä Karin und am Stefan gebührt än riisä Dank,
für d’Organisation und dass mär guät hei cho sind um jedä Rank.
Hoffentli müämär uf dä nächst Usflug nöd wieder 127 Jahr wartä,
ä Reis mit dä Ehremitglieder z’undernäh, in äs nois Abentüür startä;)